TRAYDOR KA BONIFACIO! TRAYDOR!

August 18, 2009 at 1:10 PM · Filed under lab stori and tagged: bonifacio, lab stori

Nagsugod kining akong sugilanon samtang sa dihang ako nagsakay ug jip padung sa dalan colon diri sa syudad sa sugbo. Ako nagtambo sa bintana sa jip samtang naghunahuna sa akong uyab nga si Bonifacio. Dili nako mapugngan nga hunahunaon si Bonifacio kay kagabie lang nako mahigugmaon nga nahatag ang akong lawas ug kalaag kaniya. Kini nahitabo sa usa ka sikat nga prestihiyoso nga abtanan diri sa sugbo, ang Sogo.

Samtang akong gibalik balik ug riwaynd ug pasporward ang mga panghitabo gabie sa akong hunahuna, nasiplatan sa akong mga maabtik nga mata ang akong uyab nga si Bonifacio nga malipayong naglakaw sa kadalanan samtang naay kakupot nga laing babaye. Tinuod ba ni akong nakit-an? Si Bonifacio, naay laing babaye?

Ako wala katingog. Ingon ani diay ang masinati kung mahugno ang imong kalibutan. Murag gikumot ang akong dughan ug gipakapin pa jud ug kumot ang akong tiyan. Wala na tingali ka-agwanta ug tan-aw sa akong nawng ang drayber mao nga pag-abot sa may City Hospital iya nakong gibitad pagawas sa iyang jip.

Unsa akong buhaton karon? Dili nako ganahan mabuhi. Ug samtang naglakaw ko sa kadalanan, nakakita ko ug punoan sa mangga. Ug didto ko nakahunahuna nga maghikog. Puslan mang wala nay nagmahal kanako, maypang putlon nalang nako ning akong kinabuhi! Ug nikat-kat ko sa punoan sa mangga. Sa pagsugod palang sa kat-kat, daghan na kaayo ang mga nanuol nako, kasagaran kay mga bata, abi tingali nila nga manguha ko ug mangga ug kung naay matagak kay ilaha na, pero padayon lang gihapon ko sa pagkat-kat hangtod nga naabot ko sa pinatumoy nga bahin sa punoan ug ang sangga nga akong gitumban kay mura na ug kawayan kadak-a. Ug didto gisyagit nako ang pangalan ni Bonifacio nga puno ug kalagot ug kasakit.

Ug sa dihang padung nako ug ambak, na-slayd ko sa sangga ug natumba dayon natagak… natagak.. ug ni landing sa atup sa mga kabalayan dapit sa mangga. Agay! Dili man diay lalim magpakamatay. Piskot. Sala jud ning Bonifacio! Ug ninaog ko sa atup kay nagsyagit na ang tag-iya sa balay. Naaan diay ko nga kawatan mao nga bisan sakit pa ang akong kalawasan kay nag-iport jud ko ug dagan palayo. Pero dili palayo sa kasakit ug sa kaguol…

IPADAYON…

Comments